بورتسودان : المدقاق الإخبارية
قطع رئيس مجلس السيادة الفريق أول ركن عبد الفتاح البرهان القائد العام للقوات المسلحة بمحاسبة أي شخص يرتكب جرم في حق إنسان آخر دون القانون في إشارة للإنتهاكات المجتمعية التي حدثت في الجزيرة ، مطالبا الجميع بإحترام القانون قائلا (نحن جيش ولسنا مليشيا .. مافي زول ياخد القانون بيدو) ، وتابع لازم جميعنا نحترم القانون ، موجها الجميع (أي زول شارك في جريمة أمسكو وسلمو للسلطات الحكومية).
وتابع البرهان لدي مخاطبته الجماهير في بورتسودان الذين هبوا لإستقباله عقب عودته من غرب أفريقيا اليوم الثلاثاء 14 يناير 2025 ، قائلا مبروك ليكم كلكم عودة ود مدني لحضن ومبروك لاهلنا في الجزيرة العودة لديارهم وإن شاء الله ناس الخرطوم يعودوا قريبا ونيالا والجنينة وفي كل مكان .
وأضاف الرئيس البرهان قائلا نحن كلام كثير ماعندنا .. نحن ماشين لتحرير كل البلاد .. وكلنا مصطفين في خندق واحد في معركة الكرامة ضد هذا العدو وما بنقيف الا المليشيا تنتهي ونشيد بإخوانكم في القوة المشتركة في الفاشر ومحور الصحراء دمروا اليوم أكثر من ثلاثة متحركات ، وقال دي نهاية المليشيا مطالبا إياهم بالإستسلام قائلا أي زول عندو باقي روح يجي يسلم نفسو ونحن نقبلو وحبابو الف .
وأرسل البرهان رسالة في بريد الجميع لا سيما الامراء والعمد ، مطالبا إياهم بعدم زج الشباب في محرقة الحرب قائلا (ماتجيبوا عيالكم للمحرقة أمسكوا أولادكم) ، قائلا (تجيبوهم بيموتوا ونحن محتاجين لكل الشباب لبناء الوطن والوطن دا حقنا كلنا وبنبنيهو سوا .. مش حق القحاتة ..!) .
ووجه الرئيس البرهان برفع صور الشهداء قائلا علقوا صور الشهداء مش البرهان ولا غيره ، وتابع الشهداء يستحقوا وضحوا بدمائهم .
