كشفت مصادر (المدقاق الإخبارية) عن تفاقم أزمة علاج جرحى العمليات داخل مليشيا الدعم السريع المتمردة بصورة لافتة وتزايدت حالات شكاوي الإهمال ، يتهمون قائد المليشيا حميدتي وشقيقه عبد الرحيم بإنهم يسيطرون علي عمليات علاج الجرحى ويفاضلون بين العناصر (خيار وفقوس) مما خلفت حالات إحتجاجات واسعة وسط جنود المليشيا واندلعت بسببها خلافات ميدانية طاحنة داخلها تنتقد القيادات الميدانية .
وكشف تسجيل صوتي مسرب من داخل مجموعة تعرف (حول القائد) ، إنتقد من خلاله القائد الميداني لمليشيا الدعم السريع علي رزق الله الشهير ب(السافنا) ،إنتقد الأصوات التي تشتكي عدم العلاج وإتهام بعضهم له قائلا (الماقادر علي القتال من إمكانياته الذاتية وما قادر يأكل ولا يشرب خليه يمشي بيتو ..!) .
وأضاف نحن جينا فزع الدعم السريع وماعندو ليكم ولا حق بنلسين ولا بندول ، المصاب يعالجوه أهله والبموت يفرشوا ليه، الداير يحارب معانا يحارب
في موت وفي إصابات ، الدعم السريع (زي القطر بنزل دا وبرفع دا في كل محطة ..!) .
ومضي السافنا قائلا (أنا ماعندي ليكم حاجة ، أنا زول بندقجي ساكت ما تسألوني، الداير يسأل يمشي لحميدتي في بيته مسؤول مني ومنكم ، وعبد الرحيم دقلو هم مسؤولين من كل حاجة وبيدهم العلاج والسفر للخارج والدقيق والقروش والسلاح ووزارة الدفاع وكل حاجة في يدهم ، هم القادة ومسؤولين من الدعم السريع .
وتابع السافنا قائلا أنا مما طلعت من السجن بنقاتل بحقي .. وبتعالج من حقي .. لا حميدتي أداني قرش ولا عبد الرحيم ، لا أدوني سلاح ولا كيس فول ما أدوني ليه ، انا عندي كرامتي ، نحن ديل عوينا قلعناها من أيديهن اتعالجنا بيها .
وكشف السافنا النقاب عن معاناة حقيقية يواجهونها بالميدان داخل الدعم السريع قائلا نحن (ثلاثة) أشهر قبل معركة النهود بنعد وبنجهز من إمكانياتنا ، أدونا (24) دوشكا كلام ساكت طلقة ما بتضرب رجعنا لسلاحنا الخاص سلحنا أنفسنا ، الدعم السريع ماعندو ليكم لا جيم ولا منقستو ولا قناصة ، عندو ليكم ياهو الكلاش (كليب فال) الماقادر ومسكين خليه يشيلو نحن ما بنشيلو .
وانتفض السافنا في وجه منتقديه قائلا لقيتوا وسائل التواصل الإجتماعي بيتكلموا ساكت وماعارفين حاجة امشوا وصلوها لي حميدتي انا ما عندي ليكم حاجة والداير يقاتل معنا يقاتل .